Fatuk Metan iha Fatuk Mutin Leten – (César Vallejo)
Ha’u sei mate iha Paris ho udan-anin boot
iha loron ida-ne’ebé ha’u iha lembransa
Ha’u sei mate iha Paris – no ha’u sei lahalai –
karik iha loron-kinta, hanesan ohin, iha outunu.
Nune’e duni, ohin kinta, ha’u hakerek
versu sira-ne’e, halo moras liman-ruin-kabun
lahanesan ohin loron, nunka hanoin hetan
husi dalan tomak ne’e, ha’u mesak de’it.
César Vallejo mate ona, sira baku-mate
sira hotuhotu ne’ebé buat folin-la’ek
Sira hurulele nia, maka’as ho ai-rohan
Hu’an ho xikote ida – testemuñu sira
loroloron kinta, liman-ruin-kabun sira
solidaun, udan, daladalan sira.
* Tradús husi Pedra preta sobre pedra branca // Piedra negra sobre una piedra blanca. César Vallejo, moris iha tinan 1892, poeta peruanu mate iha Paris, loron 15 fulan-abríl 1938, iha primavera, sesta-feira.
Traballadór matenek ninia hahusuk – (Bertolt Brecht)
Sé maka harii Tebas, sidade ho odamatan hitu?
Iha livru imi hetan naran liurai sira:
Maibé sira maka dada fatuk kafuak boboot?
No Babilónia ne’ebé harahun dala hira
Sé maka harii fila fali?
Ida falun osan-mean iha Lima, ninia konstrutór sira horik iha-ne’ebé?
Pedreiru sira iha kalan bainhira Muralla xina nian prontu, sira ba ne’ebé?
Roma ne’ebé aas, nakonu ho arku triunfu nian:
Sé maka halo hamriik?
César sira manán ba sé?
Bizánsiu ne’ebé hawelok knananuk, ninia palásiu la’ós ba uma-na’in de’it?
Nune’e, lendária Atlántida
Iha kalan tasi-boot hamout, tasi halerik ba ninia atan sira.
Mane-klosan Alexandre konkista Índia.
Nia mesak?
César baku-rahun Gauleze sira
Laiha koziñeiru ida hamutuk ho nia?
Filipe husi España tanis bainhira nia armada mout
Nia mesak maka tanis?
Frederico II manán Funu Tinan Hitu?
Aleinde nia, sé tan?
Pájina ida, vitória ida.
Sé maka tein hahán festa nian?
Iha dala tinan sanulu, iha ema-boot ida.
Sé maka selu ninia konta?
Iha istória barak loos
Iha pergunta barak loos
Pintura: Alfe RM
Leave a Reply