Símbolu ba Rezisténsia hasoru Ditadór Suharto*
Ba dahuluk sira bá kasa ulun ha’u-nia viziñu komunista.
basá ha’u la’ós komunista, ha’u lakohi laran-susar.
Momentu ba daruak sira bá kasa ulun
ha’u-nia viziñu husi Papua ne’ebé revolta.
basá ha’u la’ós ema be halo revolta, ha’u la laran-susar.
Ba datoluk sira bá kasa ulun
ha’u-nia viziñu timoroan ne’ebé Fretilin.
basá ha’u la’ós Fretilin ida, ha’u lakohi laran-susar.
Ba dahaat, sira mai tesi ha’u ulun nu’udar trófeu
laiha tan nein ema ida atu reklama.
Díli, 19/11/2017
*Inspira husi poema Símbolo da resistência aos nazista (Martin Niemöller – 1933).
Krús Mutin Sira
Iha fronteira sidade nian
tempu la’o no hela
iha mahon, anin-malirik simu
hafoin funu hotu
Foin hamriik hafunan foho-oan
krús mutin sira haklalak
dalabalu triste maibé nabilan
tadak domin nian ba sira be mate
homan dame hafoin funu hotu
Ponte-Meira, 16/10/2009
Nino Konis Santana
Ninia dalan leut
Paitchau ba Matebian
hadeer iha Kablaki
haloron iha Ramelau
hakalan iha Leolaku
hafalun ho funu
Rai-kidun
ninia kakuluk
Tuba-rai metin
habelun kulatra
Mate lahó lelir tristeza
rate lahó ai-funan futun
Rai, foho, lalehan, balada fuik
ai-horis husi ai-laran tuan
Bee-matan no kdadalak
sulin ba tasi, hakmatek ba
Timor Lorosa’e
halo funu hodi lorsá:
halu marau, naten halu fai*
Díli, 15/08/2012
* Kaben ho funu, tuba-rai metin halo funu
Pintura: Alfe RM
Leave a Reply