Humor (3)

TESTE HUSI PSIKIATRA – (Kontadór Ego Lemos)

Iha ospísiu, psikiatra ida halo diagnóstika ba pasiente sira atu haree ida-ne’ebé hahú di’ak uitoan. Nia haruka pasiente sira hariis iha pixina ne’ebé tuirloloos maran. Husi bulak na’in 5, na’in 4 tama ba pixina halo an hanesan ema nani, luku no hariis bee ho kontente.

Psikiatra: Sira sei bulak duni pá!

Maski nune’e, pasiente ida hamriik nafatin iha li’ur no lakohi tama ba pixina. Psikiatra ne’e hanoin pasiente ne’e kala hahú rekupera. Nia prepara pergunta ida hodi koko pasiente ne’e. Karik nia hahú hanoin loos, entaun sei permite atu fila ba uma.

Psikiatra: Tanbasá ó lakohi hariis iha pixina?

Pasiente: Bee malirin ne’e…

Psikiatra: !&*#!! [Pixina bee-maran]

---

FUTEBÓL BA JERASAUN 1980 – 1990 NIAN

Presiza Atensaun:
25 regra tebe-bola nian husi dékada 1980 to’o 1990 iha Timor-Leste:

1. Bele tau marka ho fatuk, sinelus, pasta ka sasán ruma nu’udar baliza tutun, ninia aas adapta ba guardiaun ninia altura, kuandu nia haksoit lolo-liman la to’o, signifika ‘out’ ka ‘fora’.
2. Ida kabun-teek dala barak sai guardiaun.
3. Ladún iha falta, barakliu maka ‘handsball’.
4. La presiza suteira. Se ida tau suteira no hata’uk jogadór adversáriu, entaun tenke hasai suteira foin bele joga.
5. Laiha arbitru. Desizaun iha jogu laran foti liuhosi prosesu ida ‘demokrátiku’ ka ‘aklamadu’ kuandu ekipa rua hotuhotu hatán.
6. Dala balu jogu foin remata bainhira nakukun liu ona no susar atu haree bola.
7. Guardiaun ninia knaar maka salva bola atu laiha golu no ba foti bola ne’ebé suta ba fatin dook.
8. Bainhira hetan golu, ida-ne’e dala barak kulpa fó ba guardiaun.
9. Rezultadu jogu nian dalabalun besik ho basketeból: 11-7, 6-8, 7-7.
10. Se jogadór sira hamrook bele para uitoan hodi hemu bee.
11. Bainhira atu suta bola tenke atensaun ba buat barak hanesan guardiaun ninia pozisaun, jogadór adversáriu nian, ema seluk, motorizada, karreta ka kuda ne’ebé derrepente liu.
12. Jogu sai entuziasmu liu bainhira feto sira sai espetadora.
13. Jogu bele para uitoan, bainhira foti bola ne’ebé suta ba fatin dook.
14. Se bola na’in derrepente fila, jogu mós para.
15. Iha bola oioin. Bola basketeból, futeból ka voleiból nian. Dala balu plástiku sira maka kesi hamutuk halo kabuar.
16. Nunka iha ‘offside’, até ita bele konta istória ho guardiaun adversária nian.
17. Se jogu ida iha ekipa ida manán boot ho rezultadu 8-2, entaun bele transfere jogadór kedas. Jogadór balu tama fali ekipa ida seluk.
18. Bainhira jogu hahú, lakle’ur balu hasai faru no jogu ho peitu nakloke.
19. Kuandu jogu maka’as liu, dalabalun jogadór sira bele aplika mós téknika arte-marsiál nian.
20. Kuandu udan tun, jogu sai rame liután.
21. Eskema ka estratéjia jogu nian la’ós 4-4-2 ka 4-5-1, maibé rame-rame hobur bola.
22. Laiha rasista, laiha estrela, laiha kartaun no laiha farda.
23. Dalabarak joga foin rame liu kuandu taru-osan.
24. Jogu bele halo iha dadersan, meiudia ka lorokraik. Naran katak ema natoon, iha espasu no bola.
25. Ema hotuhotu hakarak sai guardiaun kuandu iha penalti. Jogadór ida derrepente bele troka pozisaun ho guardiaun.
26. Jogu hotuhotu kuaze fó kontente…

Bele aumenta tan! 

---

Pintura: Alfe RM