Domin no Pandemia
Malirin ne’e liu ho iis kotukotuk
haksesuk ba sirene iha lurón
rein sira tun ho nakdedar
liman ho fuan ida-idak rakut malu
haneruk ho iis ida primitivu liu
laloran hamaus, baku tuituir
iha kakorok ho bisubisu be dada tuir
ba kaan ne’ebé sublime sai isin-lolon ida
karik aban ha’u dada iis-metin
ai-matan-dukur sei hadeer loron kalan
ho lian erótiku ikus nian be mai no liu
karik bainrua iha notísia, iha Vera-Cruz ida todan
ho kamat husi ó-nia nehan sei nurak-mean, lakan
versu sira-ne’e ha’u hakerek ho variante foun
karik ha’u bele hakotu-iis ho hakmatek
ho domin ne’ebé ita halo ba dala ikus nian
Díli, 23/08/2021
Segunda Doze
Livin’ La Vida Loca
nakfera
iha Incanto
Emar hadahur
liman ida ba lalehan
ida ho serveja-lata, felisita
ho momentu ida
laiha didin ba seksu
laiha konfinamentu
hotuhotu fuik
ho Mariposa Traicionera
iha kalan naruk, festa
no oin sira ezitante
namkurut
asintomátiku
no Covid habobar
iha kintu-kantu
hariku-matak balu
dadeer, segunda doze
whisky, bokon, maran
iha nanál, iha kakorok-talin
iha Incanto, festa kontinua
Díli, 01/08/2021
Fini
Rai-rahun namkari husi rain be nakfera
iha anin ninia hakohak manas, emar nakosar
husi bailoro maran be króniku, rai hafanu
Saudade atu udan tun habokon neon
hein kalohan taka-metin no rai-tarutu
atu udan-boot to’o-mai no fini sira halekar
Díli, 19/10/2023
Pintura: Alfe RM
Leave a Reply