MOVIMENTU – (Octavio Paz)
Se ó kuda inan lakan
ha’u dalan raan nian
Se ó nevaun mahuluk nian
ha’u sunu rai-hun fuan
Se ó torre kalan nian
ha’u kravu halakan ó neon
Se ó meti dadeer nian
ha’u manu mahuluk nian
Se ó luhu sabraka nian
ha’u tudik-meik loromatan
Se ó altár fatuk nian
ha’u liman sira sakríleja nian
Se ó rai hadukur nian
ha’u ai-lolon matak nian
Se ó haksoit ho anin
ha’u ibun bee-teen nian
Se ó kalohan ai-laran nian
ha’u baliu ko’a nian
Se ó sidade ida kle’an
ha’u udan halulik nian
Se ó foho kinur nian
ha’u manu-kidun liman-kabun mean
Se ó loro-matan sa’e nian
ha’u dalan raan nian
– iha Salamandra.
Octavio Paz Lozano (1914-1998) – poeta, ensaísta, tradutór no diplomata mexikana. Notabiliza prinsipalmente iha ninia traballu prátiku no teóriku iha kampu ba poezia moderna ka vanguarda nian. Simu Nobel Literatura nian iha tinan 1990. – Díli, 02/05/2018
Símbolu Rezisténsia Hasoru Nazista – (Martin Niemöller, 1933)
Loron ida sira mai no lori ha’u-nia viziñu ne’ebé judeu.
Hanesan ha’u la’ós judeu, ha’u lakohi neon-todan.
Loron tuirmai, sira mai no lori ha’u-nia viziñu seluk ne’ebé komunista.
Hanesan ha’u la’ós komunista, ha’u lakohi neon-todan.
Loron datoluk, sira mai no lori ha’u-nia viziñu katóliku.
Hanesan ha’u la’ós katóliku, ha’u lakohi neon-todan.
Loron dahaat, sira mai no lori ha’u;
Laiha tan nein ema ida atu reklama…
(Tradús husi Símbolo da Resistência aos nazistas.)
Pintura: Alfe RM
Leave a Reply