Dever husi Poeta
Sé maka lasee tilun ba tasi ninia lian
iha sexta dadeer ne’e, no sé maka dadur hela,
iha uma, eskritóriu, fábrika ka ho feto,
ka iha lurón ka su’u-fatin, ka kalabousu laran…
ba nia, ha’u mai, sein ko’alia, nein hateke
to’o-mai no loke luhan ninia odamatan
no hahú iha nakdedar, vagu, ba beibeik,
no hahú rai-tarutu naruk, monu harahun an
ba planeta ninia furin, ninia isin-lolon todan,
mota sira be kakorok-maran iha tasi-luan,
fitun sira be nakdedar lais iha le’un
no tasi baku ba mai, mate no kontinua.
Nune’e tuir ha’u-nia destinu
ne’ebé sein deskansa, rona no tau matan
tasi ninia halerik iha ha’u neon,
tenke sente soku violentu husi tasi-been
no halibur iha tasa rohan-laek ida
nune’e iha-ne’ebé de’it, karik iha luhan,
iha-ne’ebé sofre husi kastigu outunu nian
kala ha’u iha ne’ebá ho laloran fuik,
kala ha’u tama-sai liuhosi janela
no rona ha’u, matan sira sei foti sa’e
hatete: oinsá atu ha’u bele to’o iha tasi-luan?
Nune’e, lahatete buat ida, ha’u tatoli
lia-ain husi laloran be nabilan,
furin no rai-henek be naksobu,
lian bisu-bisu husi masin be hadook an,
tanis sinzentu husi manu sira tasi-ibun nian.
Nune’e, ba ha’u, liberdade no tasi
sei hatán ba fuan be namlaik subar.
Díli, 13/06/2020
Sonetu LXVI
Ha’u lahadomi ó, maibé tanba ha’u hadomi ó
ha’u bá husi hadomi sai lahadomi ó,
husi hein ó, lasai hein ó
ha’u fuan la’o husi malirin sai ahi-lakan
ha’u hadomi ó, tanba hadomi de’it ó
ha’u odi ó rohan-laek, no odi ó to’o harohan
hakru’uk ba ó no sasukat husi ha’u domin be haseluk
la’ós ha’u laharee ó, maibé hadomi ho matan-delek
karik roman husi fulan-janeiru sei han-mohu
ninia rai-lakan haterus ha’u-nia fuan tomak
na’ok ho subar xave hakmaktek nian
iha istória ida-ne’e, ha’u mate, só ha’u mesak
no mate tanba domin, tanba ha’u hadomi ó
basá hadomi ó, ha’u-nia domin, iha ahi-lakan no raan
(Husi Cem sonetos de amor)
Pintura: Alfe RM
Leave a Reply