Ó-nia Hamnasa (Pablo Neruda – Tu Risa)
Foti paun ne’e, se ó hakarak, foti mós ar ne’e
maibé keta foti husi ha’u ó-nia hamnasa.
Keta foti ai-funan-roza
funan fulin ne’ebé naksobu
husi bee ne’ebé tekitekir
sulin iha ó-nia ksolok
hamosu laloran osan-mutin
ne’ebé moris iha ó-nia laran.
Ha’u-nia luta kleur no ha’u sei fila
dala balu ho matan ne’ebé kolen
haree mundu ne’ebé lamuda
maibé bainhira ó-nia hamnasa to’o mai
sa’e ba lalehan hodi buka ha’u
hodi loke tomak ha’u-nia odamatan moris nian.
Doben, iha biban nakukun
ó-nia hamnasa mosu, tekitekir
haree ha’u-nia raan fo’er
iha fatuk dalan sira
hamnasa ba, basá ó-nia hamnasa iha ha’u liman laran
hanesan surik ne’ebé foin kadi.
Iha tasi ninin outunu
ó-nia hamnasa hi’it sa’e
bee-tiris ninia furin,
no iha primavera, amór
hakarak ó-nia hamnasa hanesan
ai-funan ne’ebé ha’u hein ba hein
funan azúl, ai-funan-roza
namuruk ba rai tomak.
Hamnasa iha kalan, iha loron, iha fulan
hamnasa iha dalan sira, iha illa ida-ne’e ninia kurva
hamnasa ba labarik moedór ida, ne’ebé hadomi hela ó
maibé bainhira loke no taka hela matan
bainhira hakat ba oin no ba kotuk
ha’u nega tiha paun, ár, naroman, primavera
maibé ó-nia hamnasa, nunka
tan lahó nia, ha’u sei mate
Tradús husi : Tu Risa/O teu riso
Poema 20
Ha’u bele hakerek versu sira-ne’ebé triste liu kalan ida-ne’e.
Hakerek, porezemplu: fitun hafutar kalan,
No fitun sira ho nabilan azúl, nakdedar iha dook.
Anin kalan be jira iha lalehan no hananu.
Ha’u bele hakerek versu sira-ne’ebé triste liu kalan ida-ne’e.
Ha’u hadomi nia, no dala balu nia mós hadomi ha’u.
Iha kalan-kalan hanesan ne’e, ha’u-nia liman sira hakohak nia.
Ha’u rei, rei nia ba beibeik iha lalehan okos be laiha rohan.
Nia hadomi ha’u, dala balu ha’u mós hadomi nia.
Oinsá maka ha’u labele hadomi ninia matan boot fixu sira-ne’e.
Ha’u bele hakerek versu sira-ne’ebé triste liu kalan ida-ne’e.
Hanoin katak ha’u lasoi. Sente katak ha’u lakon nia.
Rona kalan ida-ne’ebé aat, sei aat liu, tan lahó nia.
No ha’u-nia versu monu ba neon, hanesan maho-been iha duut sira.
Labuat ida, katak ha’u-nia domin labele hamahon nia.
Iha fitun hafutar kalan no nia lahela iha ne’e.
Maka ne’e. Iha dook ema ida hananu. Dook liu.
Ha’u neon namlaik, tan lakon nia.
Hanesan nia hakbesik mai iha-ne’e, ha’u matan buka tuir.
Ha’u fuan buka tuir, no nia lahela ona ho ha’u.
Kalan ida-ne’e duni, ne’ebé hamutin ai-hun sira ba nafatin.
Ami, ne’ebé uluk ida, la’ós ona hanesan uluk.
Ha’u lahadomi ona nia, loos duni, mas uluk ha’u hadomi tebes.
Ha’u-nia lian liu anin atu kona de’it ninia tilun.
Seluk nian. Nia ema seluk nian. Hanesan uluk nia soi ha’u-nia rein sira.
Ninia lian, ninia isin-loos moos. Ninia matan be haree dook.
Ha’u lahadomi ona, loos duni, mas karik ha’u sei hadomi nia.
Domin ida-ne’e lais liu no kleur atu haluha.
Basá kalan sira hanesan ne’e, ha’u-nia liman sira hakohak nia,
ha’u neon namlaik, tan lakon nia.
Karik ida-ne’e kanek ikus ne’ebé nia halo ba ha’u,
no ida-ne’e versu ikus sira-ne’ebé ha’u hakerek ba nia.
Pintura: Alfe RM
Leave a Reply