Kraras
Kraras
ka knua feto-faluk
ka mate-restu
Kraras raan
sorin metan ba mundu sivilizadu
rai-klaran monok ba ruin be namkari
Kraras funu
ai-daak sai sasin
dala sinu lian iha rai-nakaras
kilat-musan kasa, tebedai kahur raan
bainhira nakukun hikas
povu hamutuk sai kasadór
soldadu bapa pániku hanesan fahi fuik
molok vigansa no ezekusaun
Kraras
levantamentu ho kro’at
ho eroízmu be laran-kraik
ema sei haktuir otas ba otas
ema sei haktuir, ema sei haktuir
Balide, 19/10/2009
Kalan
Anin malirin
haleu nakukun
fulan oin-midar
habuis kalan
leno rai, leno dalan
iha leut tempu nian
Díli, 02/08/2008
Rai-hun-mutin
Rai-mutin hafanu dadeer
manu-aman kokoreek hananu
so’e ninia kanek, lori ninia roman
hakoi ninia moruk, rai ninia midar
rahun-di’ak tutuur matak-malirin
Díli, 10/11/2020
La’o-rai
Anin be suut
hafanu laran, hasuut tatuir rai-hun
hafutar neon, hasuut tatuir foho-tutun
Suut hadulas bero, suut tasi luan tatuir rain
hafurin laloran, suut anin fuik tatuir wain
Suut hanetik iluzaun ne’ebé nahisi
hanehan neuroze ne’ebé nakali
Suut habai isin-lolon ne’ebé nakmutis
Suut habiit moris ne’ebé narekas
Suut haliri rai-mutin dadeer
suut haroman tasi-ninin dadeer
Suut haliras iis iha mundu infinitu
suut haberan la’o-rai sira ninia mehi
Díli, 18/09/2020
Pintura: Alfe RM
Leave a Reply