Husi Foho Hun
Husi murak mutin be hadulas
iha dadeer ho ai-tahan namlaas
iha-ne’ebá ha’u dada besik ó-nia liman-fuan
No kuandu manu-metan sira semo dook
iha abu-abu maka mai ho naroman
hafoin re’in furak hanesan kalan nabilan
No bainhira malirin ne’e sai fatuk
ha’u liman belit fuuk be bobar sabraut
halo nakdedar iha ó-nia hakohak
tan fatuk metan sira moris
hakanoik kalan ba dala rihun
hariin ba foho hun
iha-ne’ebá mehi sira haktuir
hodi fitun sira be monu
husi foho, husi fatin aas
husi lian be moris-hi’as
husi kuda be nahehek
husi ai-hun be habelar
husi dalan kle’uk
husi bee nakrutuk
tun ba foho kle’an
ho kalan natál be haraik
be uluk nakukun
naklees
kanek
no fitar
Mauchiga, 25/12/2018
Kalan Ida
Momentu ne’ebá nein lian ida iha
kalan maka hatenu ba nakukun be iha
ho hananuk husi dook, husi tinan hirak be laiha
Silénsiu be mai hosi kalan
ho halerik isin-lolon nian
be hadeer to’o utu sira dahur maran
Hanesan la’ós knananuk baibain
husi janela kalan be naklole ba fitun wa’in
kutun sira book an iha sikun hodi hein
No udan mós tun
resita ba kalan be hatun
ho lalatak sira hobur ai-hun
kuaze atu dukur iha tutun
to’o tekitekir iha feto-raan ida tun
halo domin ho kosar be rahun
Hosi kalan ida
ba dadeer ida
be impulsiona
to’o ha’u-nia klamar fila
ho liman buka-lamas lipa
hakotu fantazia
Díli, 27/3/2019
Feto-raan
Feto-raan
hosi plantasaun, nia hamriik
la’ós ho ninia furak hodi titu hahi’i
Ita-nia liman sira badain nanis
hori otas ba otas, husi fini to’o tasak
elegánsia ba tempu ku’u kafé nian
Feto-raan
kafé ninia morin
la’ós ita-nia símbolu ba rikusoin
maibé sentidu laran-lametin serbisu-na’in
Hosi klu’ak kadadak ai-santuku
ha’u laran monu ba ai-kafé
ba ita-nia simplisidade
basá neon ki’ik iha ita oin
Gleno, 3/8/2012
Pintura: Alfe RM
Leave a Reply