Poesia – Pablo Neruda (3)

Hela Fatin iha Rai  (1937)

Akontese katak ha’u kolen nu’udar ema
Akontese katak ha’u tama ba alfaiatária no sinema sira
namlaik, inpenetravél, hanesan fulun husi manu-sizne nian
be navega ha’u iha bee-hun no ahi-kdesan nian

Morin barbeiru nian halo ha’u tanis halerik
buat ida be hakarak de’it maka deskansu hanesan fatuk ka hena-fulun
buat ida be hakarak de’it maka haree loja no jardín sira laiha
laiha tan sasán, ókulu no asensór sira

Akontese katak ha’u kolen iha ain no liman-kukun sira
husi fuuk no to’o iha ha’u-nia lalatak
akontese katak ha’u kolen nu’udar ema

Maski sei delisiozu
hodi hata’uk notáriu ida ho delak ai-funan líriu
ka hakotu madre ida ho soku iha ninia tilun
sei furak atu la’o liuhosi dalan sira ho tudik matak ida
no hakilar sira to’o mate tan malirin.

Ha’u lakohi kontinua nu’udar hun nakukun nian
la hakmatek, lolo ba, nakdedar-malirin tan dukur
tun, hodi hale’u rai ninia bokon
horut no hanoin, han loron-loron nian

Ha’u lahakarak dezgrasa barak
ha’u lakohi bá, hanesan hun no rate
mesak iha fatin-rai-okos, ho hoka matebian sira
sorin sai fatuk, mate ho laran-taridu

Tan ne’e iha segunda-feira, haree ha’u to’o mai
ho oin prizaun nian, lakan hanesan gazolina
no hatenu iha dalan hanesan roda be kanek
no hafó ain-fatin ho raan manas liu ba kalan

Ba loos kantu no uma bokon sira, sira dudu ha’u
ba ospitál sira iha-ne’ebé ruin sira semo sai husi janela
ba loos sapatária sira ho morin vinagre nian
ba lurón sira be hata’uk hanesan ku’ak leet iha kulit sira

Iha manu-fuik ho kór-enxofre no intestinu orrivel
tara iha porta uma sira ne’ebé ha’u hakribi
iha nehan falsu be haluha iha kafeteira ida
iha espellu sira be tuirloloos ho tanis moe no ta’uk nian
ho salurik iha fatin hotu, no venenu, no husar talin sira

Paseiu ho kalma, ho matan sira, ho sapatu sira
ho hirus no haluha buat hotu
ha’u hakat liuhosi eskritóriu no loja ortopédika sira
no pátiu sira iha-ne’ebé roupa tara iha arame ida
koekas, toalla, no kamiza sira ne’ebé tanis
ho matan-been foer be sulin

---

Sonetu XVII

Ha’u lahadomi ó, hanesan ó masin ai-funan roza, ka fatuk-topáziu
ka ai-funan kravu sira-nia rama-oan be habelar ahi
ha’u hadomi ó hanesan hafó domin loos ba buat sira iha nakukun
sekretamente, entre lalatak no klamar

Hadomi ó hanesan ai-horis ne’ebé lafunan no sai
maibé iha ó-nia laran, helik hela roman ai-funan sira
ho matak-malirin hosi ó-nia domin iha ha’u-nia isin nakukun
ho morin metin be mosu mai husi rai

ha’u hadomi ó lahatene oinsá, bainhira, ka iha-ne’ebé,
hadomi ó diretamente lahó problema sira nein orgullu:
nune’e hadomi ó tanba lahatene maneira seluk hodi fó domin

se lanune’e, iha-ne’ebé ha’u laiha, ó mós laiha
besik liu ó-nia liman iha hirus-matan hanesan ha’u-nian
besik liu hanesan ó-nia matan sira dukur iha ha’u-nia mehi sira

(Cien Sonetos de Amor, 1960)

---

Pintura: Alfe RM