Poesia – Tetum (5)

Laloran lorokraik

Laloran iha tasi baku ba mai
atu tasi ninia furin haksasin
emar mate, mout iha tasi
tiru ho kilat-musan, tarutu
husi soldadu invazór sira
dezembru hitu-nulu-resin-lima

Laloran iha tasi baku ba mai
atu tasi ninia furin haksasin
emar la’orai sira hakur tasi
hafoin knua no sidade motuk
tan invazór sira-nia liman-foer
setembru hitu-nulu-resin-sia

Lorokraik iha Díli to’o Ataúro
laloran husi tasi la hakmatek
to’o emar halenok, hamurak
ba rihun be husik ninia rain
ba rihun be persegidu
ba rihun be mate

Díli, 1/09/2009

---

Liafuan Lakon

Liafuan ida lakon
bainhira estrofe ida hakotu
ho poema madrugada ninia tanis 

Melodia ida naksala
bainhira lia-domin ne’e hananu
latan iha lalatak ó-nia hakohak, lanu

Se sabór kaan nian namlele
ho turuk ikus sei iha botir-ibun
re’in naruk ne’e dukur iha ó ibun

Se aljemas kesi ha’u liman-ain ho knananuk sira
versu sira-ne’e ha’u hakerek entre didin mate nian
atu pelumenus iha liafuan ida ne’ebé ha’u dedika

Se kloot ida-ne’e oho klamar no lolon
halerik no ritmu maka sei nakfila ba dahur
atu iha mehi rohan ida ba ema sira be luta no terus 

Se lia-anin haktuir ha’u sei laharee tan ó
dadolin sira sei rohan-laek hodi lembra
katak liafuan lakon nakfila ba ó-nia naran

Díli, 15/3/2018

---

Liutiha Udan

Liutiha udan be bokon ha’u latan
iha lurón ho arrota be ema hakribi

Ha’u hadeer ho iis iha kalilin
ho ruin be siin no malirin
hei ba nia be liu ho fuuk mahar metan
ha’u like iha Facebook, hafuhu ninia matan
iha anin, iha biban virtuál

Nia hariis ho bee lalehan nian
bokon husi fuuk lahan to’o ain-kukun hanesan
iha suar arómatiku husi ninia movimentu be liu hanesan
iha fleksibilidade be halo hamrook, be fuik hanesan
sensualidade murak be bobar malu ho kalan

Nia hamnasa mai hanesan besi-asu
be halo haluha tiha propaganda mamuk
ho fake news bombástiku ne’ebé polítiku sira muta sai

Oh, liutiha udan be malirin 
ha’u hakarak fila, hamutuk ho nia
iha tasi-ibun, ho tasi ninia furak ho nia
hodi haktuir katak bainhira udan-been
iha ha’u-nia nakduir, mosu anin lotuk hanesan
mahon-been turuk iha jornál be hafalun kidun okos
Oh, iha loos ukun-na’in be sai headline dadeer ninia oin
iis dois, ah, ami hamnasa hamutuk ho malirin iha isin-lolon

Díli, 20/12/2018

---

Pintura: Alfe RM