Ba Mita Bela
Madrugada hahú ho kantu ki’ikoan sei dukur
no molok rai-mutin iha tasi azúl, ó to’o-mai
iha-ne’e, iha kuartu ki’ik ne’e malirin hahú mohu
livru sira helik iha estante, monok, no ritmu sira hahú
ha’u horon ó-nia iis ba dala uluk nu’udar ahi naksunu
maski ha’u la koñese ó, hanesan mós ó la koñese ha’u
lakan mak iha isin-lolon ho tentasaun be nadodon
dala ida, dala rua, ba beibeik envolve kalan ba loron
iha-ne’e, iha kuartu ki’ik ne’e ó-nia fuuk-lahan sei morin
ho beiju sira be haktenik, sei metin ho perfume iha didin
karik ó sei mai, ita rua sei to’o tutun ho karan sira be moris
hodi ha’u imortaliza, ó mai iha madrugada no liafuan sira moris
Díli, 14/09/2021
Mate Ida
Mate ida no ema ida-rua haloot iha rai fuik
laiha serimónia, laiha vizita husi emboot ruma
mídia sosiál rame ho Narciso ninia lalatak
mate dadeer, loraik hakoi iha foho hun be laiha naran
hada fatuk, laiha plaka, sein epitáfiu, nein monumentu
laiha koroa-funan, lahó biografia, nein istória
mate, latan iha klínika ki’ik tuan be mamuk
lahó bandeira, sein marxa, nein trombeta lian
solitáriu lahó tributu, nein poezia, satán lutu loron tolu
mate hebai lahó lelir, laiha misa, nein orasaun
tanan, sein uma, entantu emboot ho feen-ki’ik fahe projetu
uluk oferese matabixu fila fila ba komandante, ohin mate-ruin
ho kilat-musan rahun sei iha isin-lolon be laiha beran
ho sasukun iha uat, diuk iha tilun, rahun ho xoke elétriku
tan asegura funu-na’in be subar hodi luta no hamaus kalan
agonia ho promesa, emboot sei hola ninia oan liutiha funu
feto-raan be agora ferik, mesak ho oan husi emboot no invazór
mas laiha dokumentu, sein sasin, nein marka ba fitar sira be maran
mate ohin no Borja ninia silénsiu halo minutu ida iha anin
rai-rahun halekar no ai-horis moris-hi’as iha tempu be liu
ai-funan sira morin, nafunan ho rihun memória be lekar
Díli, 04/10/2021
Hamnasa husi Lalehan
Iha tasi ninin, laloran namkari
Ato, Ano, Ajanu, dribla iha rai-henek
ain-ki’ik sira, finta ho ninia nafurin
ain-tanan, kedok, nakdulas ho ksolok
Pantera Negra ninia klamar maka bidu
Pérola Negra ninia lalatak maka dahur
Pibe de Oro ninia májiku maka haklalak
hotuhotu hamnasa ba golu divinál husi lalehan
No liras sira semo tun iha nakaras
Aliku, Apeu, Adanu, halai nakosar
selebra ho tasi ninia namudur, silénsiu
elejia ba mehi sira iha sillueta lorokraik nian
Díli, 14/04/2023
Pintura: Alfe RM
Leave a Reply