Poema 12
Ba ha’u-nia fuan natoon ona ho ó-nia susun,
ha’u-nia liras sira ba ó-nia liberdade.
Husi ha’u ibun sei to’o iha lalehan
hafanu saida maka toba iha ó-nia klamar.
Iluzaun iha ó laran ba kada loron.
Ó to’o mai hanesan mahon-been iha korola sira.
Murak-mean iha orizonte ho ó iha fatin dook.
Semo rohan-laek hanesan laloran.
Uluk ha’u hatete o hananu iha anin
hanesan ai-piñeiru ho ai-riin sira.
Hanesan sira ó aas no monok.
No lakle’ur triste, hanesan viajen ida.
Oin-midar hanesan dalan tuan ida.
Eku no lia-nostáljiku maka hela ho ó.
ha’u hadeer no dala balu manu sira la’orai
no semo toba iha ó-nia klamar.
(Iha Veinte Poemas de Amor y una Canción Desesperada)
Asu Ida Mate
Ha’u-nia asu mate,
hakoi iha jardín
hamutuk mákina tuan be meak.
Loron ida ha’u sei hamaluk nia, iha-ne’ebá
maibé ohin loron, husik nia ho ninia manta tuan
ho ninia toman-aat no ninia inus-been
No ha’u materialista ne’ebé laiha fé
ba promesa saida de’it husi lalehan seleste
hodi hafó ba naran ema ida
ba asu ida-ne’e ka ba asu hotuhotu
ha’u fiar, iha lalehan asu nian
ha’u-nia asu hein hela
ho ikun nakdulas, habelu ha’u atu tama
maibé ha’u fiar, ha’u sei la tama.
Ai, ha’u la haktuir tristeza iha rai ida-ne’e
tan de’it lakon belun ida,
nune’e ha’u nunka sai servidór ida.
Ninia amizade ho ha’u hanesan ourisu ida
ne’ebé hametin ninia kbiit tomak
babelun ho fitun ne’ebé hamriik mesamesak
la ezajeru, liu fali intimidade ne’ebé presiza
nia la sa’e ba ha’u-nia roupa leten
hakonu ho ninia fulun ka hada’et merik
no nunka kose ba ha’u-nia ain-tuur
hanesan asu sira seluk ho ninia kaan seksuál
Lae, ha’u-nia asu fihir ha’u
hafó atensaun ne’ebé nesesita
ho atensaun nesesária
atu ema loko an hanesan ha’u, komprende
katak, nu’udar asu ida,
ho ninia matan be moos liu duké ha’u nian
nia lakon tempu barak, maibé fihir nafatin ha’u
ho fihir ida maka rezerva hela mai ha’u
ho ninia midar tomak no ninia moris be sabraut
ho ninia vida silensioza
hakbesik no nunka atu inkomoda
no la husu buat ruma.
Ai, dala hirak kedas, ha’u laran-moras ba ninia ikun
bainhira la’o hamutuk iha tasi ibun
iha Isla Negra be nakonu invernu nonok nian
ho manu glasiál semo iha anin leten
ha’u-nia asu ninia fulun naruk halimar ho haksoit,
nakonu voltajen tasi nian be halo movimentu:
ha’u-nia asu la’orai no sei horon tuituir
ho ninia ikun nabilan hamriik sa’e
ho oin hasoru kedas tasi-luan ninia furin.
Haksolok, haksolok, haksolok
hanesan asu sira mesak maka hatene haksolok
nune’e de’it, hanesan absolutizmu
natureza nian ho neon ida be moe-la’ek
Laiha adeus ba ha’u-nia asu ne’ebé mate
Laiha, nein bosok ida iha ami leet.
Nia bá tiha ona no ha’u hakoi nia,
nune’e de’it, nia iha.
(Tradús husi Meu Cachorro morreu)
Pintura: Alfe RM
Leave a Reply