Humor (2)

PENSAUN VITALÍSIA

Iha aula eskola primária ida, profesór Alberto ne’ebé fuuk-mutin koko enkoraja ninia estudante ida-idak atu iha sira-nia moris sempre barani mehi. Tanba mehi nu’udar buat gratuita ida. Ho lian maka’as nia mós husu estudante ida-ida atu mehi.

Prof. Alberto: Dolores, ó-nia mehi aban bainrua hakarak sai saida?
Dolores: Sai médiku, profesór!
Prof. Alberto: Tanbasá?
Dolores: Tanba ita bele kura no trata ema moras.
Prof. Alberto: Agapito, ó-nia mehi?
Agapito: Sai polísia tranzitu nian.
Prof. Alberto: Razaun?
Agapito: Tanba bele tau matan ba tráfiku, nune’e hamenus asidente.

Profesór Alberto mós doko-ulun hatán no husu estudante ho naran Hugo ne’ebé sempre dukur hela de’it.

Prof. Alberto: Hugo, ó-nia mehi?
Hugo: Sai deputadu!
Prof. Alberto: Tanbasá?
Hugo: Tanba liutiha tinan 5, la presiza serbisu ona, han, hemu, toba, lanu uitoan no bolsu mahar hela de’it ho pensaun vitalísia.
Prof. Alberto: •#@!!!?
Prof. Alberto: Preguiçoso! Rona! Ema hotuhotu foin bele orgullozu bainhira hisik kosar maka han. La’ós han no toba de’it. Hanesan fahi tama toos! [hirus]

Estudante hotuhotu hamnasa kaer kabun haree Hugo oin-mean.

---

LIA-MENON HUSI PAI

Madre: Oan-sira, sé mak hakarak tama ba lalehan?

Labarik sira: Ha’uuuu!

João ne’ebé tuur liu iha kotuk nonook de’it.

Madre: Sé maka hakarak tama infernu?

Labarik sira: Lakohiiii!!!

João nafatin nonook hela de’it.

Madre: João ó hakarak tama lalehan ka infernu?

João: Rua ne’e hotuhotu ha’u lakohi madre…

Madre: Tanbasá?

João: Basá molok ha’u-nia aman atu mate, nia fó lia-menon, João saida mak akontese mós ó tenke tama ba forsa!

Madre: #dh@3!!

---

Foto: Alfe RM