Pájina Ikus
Nelson halo viajen husi Dili bá Covalima ho bis [autokarru] kalan. Bainhira liu Colmera, katuas ida sa’e no fa’an livru.
«Bainó, livru! Iha livru hodi interpreta mehi, livru domin nian, relijiaun nian no seluk tan,» dehan katuas.
Nelson ne’ebé susar atu toba sai atraídu. “Iha livru orrór nian ka?”
«Oh, gosta istória orrór nian ka? Sorte! Sei iha ida, ne’e kona loos. Sobre bis ho nakonu klamar-aat.»
Ninia títulu, “Bis Klamar-Aat, halo isin-fulun hamriik.»
«Ne’e mós di’ak! Presu hira?»
«75 US $ bainó.»
«Karun loos pá.»
«Ah, ne’e best seller! Ema hotuhotu maka lee livru ne’e, hetan xoke liuliu ida fin ne’e,» katuas ne’e halo promosaun atraente.
Nelson fó-laran kedas. Lahatene tanbasá bainhira nia fó osan, derrepente rai-lakan tarutu no anin huu maka’as. Katuas ne’e tun, mas neineik hateke fali Nelson ninia oin.
«Bainó,» hatete nia ho lian lotuk «Saida mak sei akontese, se bele lalika loke pájina ikus! Labele haluha! Se lae, ó sei arrepende no ha’u labele responsabiliza.»
Nelson fuan naktuku maka’as. Tan ta’uk demais to’o labele foti ulun bainhira katuas ne’e tun no lakon iha nakukun laran. Meia-noite nia lee hotu livru ne’e. Só pájina ikus maka lae no loos duni, estória ne’e hata’uk to’o hamosu impulsaun. Bis mós halai maka’as no udan boot ho rai-lakan tarutu tuituir malu. Nia hateke sorisorin, afinál pasajeiru hotuhotu toba dukur hela. Ninia isin-fulun hahú hamriik.
«Lee pájina ikus ka lae?» Nelson hanoin duvidozu, entre kuriozu no ta’uk sai ida de’it.
Iha li’ur kalan nakukun liután. «Ah, lee dala ida de’it ba. Pájina ida de’it ona!»
Ho liman nakdedar nia loke pájina ikus no hahú lee neineik. Haree-hetan pájina mamuk ida ho eskrita badak iha sikun karuk leten. Nelson tolan kabeen no lee liafuan ida-ida:
“BIS KLAMAR-AAT
Publika husi Coração Limitada.
Presu: 2 US $”.
Fora da Área Cobertura
Mane-klosan Fulgéncio apaixonadu ba feto-raan Suzana. Só Fulgéncio labarani vizita uma, tan Suzana ninia na’i-mane no maun sira mesak si’ak-teen.
Suzana: Se hakarak bá uma, tenke telefone uluk. Nune’e ha’u bele sai nonook atu apá ho maun sira laharee. Ó labele bá nonook de’it.
[Loron ida molok vizita uma, Fulgéncio telefone uluk kedas. Maibé Suzana ninia apá maka simu telefone.]
Fulgéncio: Olá, bondia! Bele ko’alia ho Suzana?
Suzana ninia apá: Olá, bon dia! Ne’e ho sé?
[Rona Suzana ninia apá mak hatán, Fulgéncio fuan-ki’ik no atrapalladu loos.]
Suzana ninia apá: Olá, ne’e ho sé?
Fulgéncio: Ne’e ho…
Suzana ninia apá: Olá, ne’e ho sé?
Fulgéncio: O número de telefone está fora da área de cobertura.
Suzana ninia apá: !#@!!??
Leave a Reply