Raan be Fakar
Kintál ne’e sei hanesan uluk
ho kantu ki’ikoan be hateke maramaran
no fihir uluk nian sei haliik kona fuan
ho brinkedu labarik nian be uut
Tempu naruk ona no ida-idak namkari husi ne’e
no kurva ki’ikoan be uluk sai faról hahú meak
uluk iha kalan aat ikan-ruin belit iha kakorok
domin dala uluk mate iha baioneta sidun
No rai-bokon ne’e mós hahú nakfera rahun
odamatan ninia ferrujen maka nakliik ho fitar sira
ho tadak uluk nian sei metin iha anin, atu lahaluha
tristeza hirak be mai no liu ho grilu ninia hananu
Sei mai ho nehek sira, nonook hanesan uluk
ho labadain sira harii knuuk hamoris fatin ne’e
du’ut no rai-rahun halerik, hein ó-nia moris-hi’as
ho ai-hun ninia abut no lolon, tuba ba udan-bailoron
Ohin ho loron be aas nakali, iha-ne’e ha’u nakdedar
hirus ho kosar no malirin hein janela be nakloke ba kalan
no liman-kukun rohan book an dolar iha rai, atu lahaluha
raan be fakar, kanek be maran ho ó-nia iis be kotuk
Díli, 28/11/2020
Moris ka mate
Saudade ba tasi karik iha ó-nia lalatak
hahii fulan lotuk, karik iha ó-nia kanotak furak
saudade ba foho karik iha ó-nia re’in makilik
ho kalan be luflafu, lu’ut iha ó-nia lian hahihik
ha’u klamar haneruk ó-nia isin be hamanas
luku, helik iha ó-nia fihir be sadia no haliras
Doben, hori paixaun bulak nian hamorin
iis mate nian parese tun mai, murmura ho anin
no beiju impulsivu sira bokon iha ha’u ibun
karik atu ita rua latan rate ida, uut no rahun
ha’u kala iis laek ho virus be namtati iha artéria
ho ruun-nehan be haterus, mas ha’u sei tuba!
ruu iha isin no ha’u kbiit laek, mas iha kaan
atu rakut malu ho nakar, moris ka mate!
Díli, 9/05/2020
Funu
Funu no ema sira mate mohu
No fábrika ba kilat sira raut osan
Pregadór falsu sira sakar lian
Maktuir sira hahú loke livru tuan
Sira ho matan-delek hananu
Terrorista! Estremista! Radikalista!
Pregadór falsu sira la kestiona tan!
Maktuir delek sira la preokupa tan!
Tansá rain mak hetan hili sei funu?
Tansá povu ida loos maka hetan hili?
Tansá povu be hetan hili ukun ho kro’at?
Tansá povu ida sei luta ba ukun rasik-an?
Díli, 20/09/2023
Pintura: Alfe RM
Leave a Reply