Ai-funan morin
Loron be tarutu
ho kalan be hatun
lori lia-anin be hakfuik
bobar ho isin-lolon be kosar
asu sira hakru’uk no hatenu
sai fahi be fo’er no kolen
ho sigarru suar, merik no garridu
la’o iha bár, iha otél baratu
iha kama be nakonu kutun
iha ritmu ho iis be rahun
Noi, Ani, Alita, Abita
feton be dahur
ho ibun mean
ho fuuk lakan
ho bluza loja nian
no saia obralan
rega mina morin
sura ba kalan hodi moris
ida hatete ami feto aat!
ida dehan ami feto puta!
no fitun sira hananu hela
no ai-funan sira bidu hela
Díli, 28/09/2019
Lurón ninin
Lurón ninin lakan
ho tafui bokon iha rai-maran
ho kutun sira be nafunan
butuk husi fo’er laran
Iha ne’ebá hahaek bulak
hadois jardín ho tua merak
iha tasi ninin ninia murak
hafalun an ho teen kafuak
Dansa no droga, brinda ho kopu
ho dada-lia be falun idiotizmu
no pinta ibun rebo-rebo hafutar an
dolar tun-sa’e, foti-oin no foti-an
Lubun ho hena kulapur
iha mota ninin halibur
la hakotu hirus be lakan
tan ukun taka sira-nia ahi-matan
Liman sira ho fatuk kabuar
husi lubun be hirus nakdedar
hasobu festa, halo namtate lalar
be semo namkari, be lambe halimar
Ho nanál be tun-sa’e bebar
ho katar dois be subar
ho utu aat be bobar
husi bolsu be mahar
Lian sira hotar
husi lurón ninin hakilar
kumu-liman sira hakilar
iha marxa, sira hakilar
Iha anin sira hakilar
sira hakilar!
sei hakilar!
sei hakilar!
Díli, 27/08/2019
Lurón Naruk
Fatuk sira halekar hakonu fatin-fatin
rai-rahun rurál nian hafalun abu-abu
malirin nahorut, kaan ba fihir ida kalorozu
mamuk maka nonook, sedúz, habulak ha’u
nu’udar balada sentimentál iha lurón naruk
bá-mai ho lakateu ninia kanta be tun-sa’e
kala juís no médiku duun ha’u bulak, la importa!
basá nein domin ida boot, la’ós husi uat be habulak
la’o iha sikun ki’ikoan sira, husi sudin to’o rohan
ho rai ninia monok be tuirloloos anin halakan ahi
maski runguranga no toos, domin iha razaun atu tuba
semo lemo tuir manu-liin sira ho ladaíña moris nian
nu’udar animál rasionál iha viajen lahó diresaun
kala hanesan tali-hun ho fulan lotuk ninia lalatak
iha ilas kalan, dulas ba nakukun, dulas ba naroman
bidu to’o dadeer ninia razaun harii hikas destinu
Díli, 19/09/2023
Pintura: Alfe RM
Leave a Reply