Ai-funan Roza
Iha silénsiu ninia malirin
ai-funan mean hafutar
hafunan hatun lia babeur
hamorin ba kalan loron
iha ninia iluzaun be nakfera
hamnasa ho momentu sentimentál
nakfila ba lalatak be hahú lakon
namkari, ida-ida semo aas dook
hafoin beijiñus murak, nabeen
ho sedusaun be manas hadukur
to’o ita kolen ho kla’ak ninia lakan
borus tun ba fuan ida-ida ninia kle’an
sunu ho raan, nafurin iha lolon
ho silueta be kamutis iha matan
ita rua hadahur, ita rua hananu
hamaus malu ho mehi absurdu
ha’u hadeer iha kalan
ho insónia domin nian, naruk
ho bisubisu be rahun, namlaik
ho funan-roza, morin be hahú mohu
Díli, 16/10/2019
Re’in Ikus
Iha-ne’e hatene katak ha’u lahatene
ne’e taturik furak liuhusi nakaras be liu
hosi ne’e lahatene katak ha’u hatene
raan-manas maka mean-laranja be huu
ho tasi ninia furin lori metafora sira
britas, rai-henek halelir, lulun bá-mai
liafuan, liman-fuan sira hamaus ho kosar
manas, malirin ho beiju bokon sira
tristeza sai alegria ho iis be halakan
isin-lolon halerik, haklamar ho ksolok
hodi bero ki’ik hafera, bidu iha ritmu
neineik, lailais ho orgazmu be haloron
kalan mós nabilan husik ninia malahuk
hodi domin foer no imajinasaun be kanek
iis ida, ba oin, ba kotuk to’o latan hakmatek
ho re’in ikus midar husi fuan sei la mohu?
Díli, 12/3/2020
Loron
Dadeer mai ho silénsiu
hafuhu ba ó-nia oin
tempu la’o atu sékulu ida
atu hein hamnasa ida
atu kari saudade ida
Díli, 08/07/2016
Pintura: Alfe RM
Leave a Reply